-273. ഉത്തമപ്രതിഷ്ഠ
ദർപ്പണം അല്ലേ വരപ്രതിഷ്ഠ — ദേവാ ?
വേദാന്തസാരത്തിൽ നീയല്ലേ ഞാൻ!
ദിവ്യമാം നിൻ രൂപം തേടി ഞാനെത്തുമ്പോൾ
വിഗ്രഹം ഞാൻതന്നെയാകുന്നുവോ ?
അതോ തത്ത്വമസി സത്യം ആകുന്നുവോ ?
നിൻ ദർശനത്തിനായ് ഞാനെത്തും നേരമാ
വിഗ്രഹം എന്മുഖമായ്ത്തിളങ്ങും,
മാനസ മായിക ഭാവങ്ങളെപ്പോലും
പ്രതിബിംബമായതിൽ കാണുമോ ഞാൻ?
സ്വയമേവ ഞാൻ നിൻ പ്രതിഷ്ഠയായ് മാറിയോ
എന്നിലെ ദൈവത്തെ അറിയുന്നതോ ?
പറയൂ ദേവാ … ദേവാ….ഗുരുദേവാ….
ക്ഷേത്രജ്ഞനെക്കാണാൻ കോവിലിലെത്തുമ്പോൾ
ക്ഷേത്രത്തെമാത്രം ഞാൻ കാണുന്നുവോ ?
അമ്പലം ചുറ്റി പ്രദക്ഷിണം വെയ്ക്കുമ്പോൾ
എന്നുള്ളിൽ ചിന്തയിതൊന്നുമാത്രം :–
ഞാൻ ഒരു വിഗ്രഹം ആകുന്നുവോ — ദേവാ
ഈശ്വരനായ് സ്വയം മാറുന്നുവോ ?
Satish Menon 04-05-18