ചന്ദ്രിക

നീല വർണ്ണത്തിനു  നാണം ജനിപ്പിക്കും   

കാർവർണ്ണാ നിൻ കാന്തി അതിരമണീയം !  

പൂവൊളി വിതറുന്ന പുഞ്ചിരിക്കൊഞ്ചലിൽ

പഞ്ചമിച്ചന്ദ്രനും  അഞ്ചുന്ന പോലവേ !!    

മോഹന ലീലകളാടേണം മാനസേ

മുരളിയിൽ മധുരമാം മോഹനം പാടേണം !

ഹൃദയേ തെളിയേണം നിൻ ദിവ്യ രൂപങ്ങൾ

മനമാകെ നിറയേണം മായാ മനോഹരാ  !!

തിരുമാറിൽ പുണരുന്ന മണിരത്ന  മാലയും

ശംഖു പോൽ വിളങ്ങും ഗളനാളവും ഹരേ ! 

അധരാമൃത  വേണുഗാനങ്ങളും

കാണുവാൻ, കേൾക്കുവാൻ ആശിസ്സു നൽകണേ !!

KrishnaKripa 12-23-20